Orri Steinn boðaði landsliðsmenn á fund vegna drykkju

RÚV · 10/16/2026, 9:08:50 AM

Fram hefur komið í fjölmiðlum undanfarna daga að nokkrir leikmenn íslenska karlalandsliðsins í fótbolta skelltu í sig nokkrum áfengum drykkjum fram eftir kvöldi eftir leik Íslands og Búlgaríu á Laugardalsvelli fyrir að verða hálfum mánuði. Íslenska liðið átti svo flug til Eistlands daginn eftir þar sem næsti leikur var spilaður. Arnar Gunnlaugsson landsliðsþjálfari segist í viðtali við Vísi hafa verið sár og svekktur með athæfi þessara leikmanna en vill ekki gefa upp hverjir eiga í hlut. Málið sé afgreitt og leikmennirnir hafi sýnt iðrun. Leikmennirnir sýndu iðrun „Meira en iðrun. Þeir voru mjög leiðir yfir þessu. Ég er mjög stoltur af mínum fyrir­liða, Orra Steini, fyrir að hafa kallað leik­manna­hópinn saman og haldið góðan fund. Án aðkomu minnar. Það er mikilvægt að leik­menn fái að pústa. Við stigum skref í að verða al­vöru full­orðin­slið með því að tala hvorn annan til og veita aðhald. Ég var mjög sáttur við það. En á endanum er það þessara leik­manna, sem gerðu þessa hluti, að sjá til þess að þetta gerist ekki aftur,“ segir Arnar í viðtalinu á Vísi. Arnar segir undirbúninginn fyrir útileikinn við Eistland hafa litast af þessari uppákomu þar sem halda þurfti bæði liðsfundi og einstaklingsfundi til að fá botn í málið. „Mönnum líður ekkert vel yfir þessu og það er nógu erfitt að spila fót­bolta­leik, hvað þá lands­leik í nútímaár­ferði og vera ekki með ein­hvern bagga hangandi yfir sér þegar leikurinn hefst. Það var kannski aug­ljóst að við vorum ekki alveg ofan á í þessum leik. Þess vegna sagði ég í viðtali eftir leik, án þess að hafa út­skýrt það, að stigið hafi bara verið nokkuð gott.“ Þá segir Arnar í viðtalinu að leikmennirnir hafi fyrst og fremst brugðist sjálfum sér og liðinu frekar en honum. Arnar segir þessa hegðun þó vera vanvirðingu gagnvart stuðningsmönnum, þjóðinni, leikmönnum, stjórn og þjálfurum.