HSÍ getur ekki styrkt Sérsveitina lengur

RÚV · 10/23/2026, 2:05:20 PM

HSÍ sendi frá sér yfirlýsingu í dag þess efnis að sambandið geti ekki lengur styrkt Sérsveitina, stuðningsmannahóp íslensku handboltalandsliðanna, fjárhagslega líkt og það hefur gert undanfarin stórmót. Í það minnsta ekki á næstu tveimur stórmótum: EM kvenna í desember og HM karla næsta janúar. Samkvæmt yfirlýsingunni nam styrkur síðasta árs á fjórðu milljón króna. Núverandi fjárhagsstaða sambandsins gerir HSÍ ekki kleift að halda þeim stuðningi áfram. Verulegur niðurskurður hefur verið í starfsemi HSÍ undanfarin ár og fækkað hefur verið í starfsliðum flestra landsliða, til dæmis á stórmótum yngri landsliða í sumar þar sem einungis fjórir starfsmenn fylgdu hverju liði. Andstæðingar Íslands voru jafnvel með allt að níu starfsmenn í sínum teymum. HSÍ þakkar Sérsveitinni þó stuðninginn sem og öllum þeim sem standa með íslensku landsliðunum. Þrátt fyrir niðurskurðinn skiptir stuðningurinn leikmenn og þjálfara miklu máli.