Thea spilar sinn 100. landsleik á morgun

RÚV · 10/23/2026, 11:15:14 AM

Thea Imani Sturludóttir er leikreyndust í núverandi landsliðshópi Íslands í handbolta. Hún spilaði í gærkvöld sinn 99. A-landsleik þegar Ísland sigraði Pólland í vináttuleik ytra og jafnaði þar með Sunnu Jónsdóttur í fjölda landsleikja, en þær deila nú 12.–13. sæti yfir leikjahæstu landsliðskonur Íslands frá upphafi. Ísland sækir Pólverja aftur heim á morgun í Katowice og það verður þá 100. landsleikur Theu. Thea skoraði þrjú mörk í leiknum við Pólverja í gær og er þar með búin að skora 227 landsliðsmörk. Hún fór í gær upp í 11. sætið yfir markahæstu landsliðskonur Íslandssögunnar þegar hún hafði sætaskipti við Önnu Úrsúlu Guðmundsdóttur sem skoraði 224 landsliðsmörk. Aðeins ellefu íslenskar handboltakonur hafa rofið 100 landsleikja múrinn. Af núverandi landsliðskonum eru Hafdís Renötudóttir (81) og Díana Dögg Magnúsdóttir (76) svo næstar þessum stóra áfanga. Fleiri áfangar í leikjafjölda nást hjá landsliðinu í Póllandi því landsliðsfyrirliðinn Sandra Erlingsdóttir lék í gærkvöld sinn 50. landsleik. Hún er í 45. sæti yfir leikjahæstu landsliðskonur Íslands frá upphafi.